Os verdadeiros Pedro del Rincón e Diego Cortado queren axustar contas con Cervantes por ter publicado ás súas costas un episodio fugaz das súas vidas pero que os condenou por sempre a responder á imaxe de pícaros. Un éxito de xuventude do que nunca se puideron recuperar. Como o Gordo e o Fraco ou Os Pecos, Rinconete e Cortadillo deben seguir xuntos para sobrevivir. Quizais agora chegou a ocasión de limpar o seu nome. Alberto Conejero, dramaturgo que está destacando como unha das voces máis singulares e talentosas da autoría nacional, recentemente recoñecido co Max, continúa o misterioso final da novela exemplar de Cervantes con esta enxeñosa comedia sobre a picaresca, a amizade e a loita entre a realidade e a ficción cos que Cervantes dou paso á modernidade. O atrevemento, o humor negro, a expresividade, o absurdo ou a complicidade co público que caracterizan o estilo SeXpeare converteron á compañía nun referente do teatro de humor, que nos sorprendeu coa súa frescura e orixinalidade nas súas anteriores visitas ao FIOT.
Intérpretes: Santiago Molero e Rulo Pardo
Axudante de dirección: José Carrillo
Deseño de espazo escénico: Salva Bolta
Deseño de iluminación: Marino Zabaleta
Vestiario: Tatiana de Sarabia
Composición musical: Mariano Marín
Autor: Alberto Conejero, a partir da novela de Cervantes
Dirección: Salva Bolta
